المساعد الشخصي الرقمي

مشاهدة النسخة كاملة : الشتاوات في الاعراس الليبيه


غدير
26-11-2010, 12:44 AM
http://www.hawa.ly/uploadednew/15_11290721177.jpg


في جميع ارجاء ليبيا الحبيبة تتميز افراحنا بأحيائها بالدربوكة http://i87.servimg.com/u/f87/11/77/27/61/images10.jpgوالصفيق :ha1:والزغاريد والشتاوات

فيه ناس يجيبوا في فرقه تعزف بالآلات الموسيقيه بس الاغلبيه عندنا يحيوا الفرح الأهل والأحباب وعاد أكثر شيئ يميز الاعراس الشتاوات الي كل يوم من العرس ليه شتاوات خاصة بيه واليوم جايبتلكم شوي شتاوات من مدينتي مصراته نتمنى يعجبوكم ونتمنى من كل عضوة من اعضاء المنتدى تشارك بالشتاوات الي يتميزو بيها في مدينتهم

نبدو بسم الله

اول يوم من ايام الفرح يوم الرمي

وهذيم بعض الشتاوات الي يغنو فيهم يوم الرمي



يسعيدي بنسقد رميه .. الي يحل العين العميه

يامبروك عليه ارماه .. الي باهي في الفم اسماه

يوم سعيد وفاضي بالي .. بنسقد رميك ياغالي

مبروك عليه علايقه .. عرس والدنيا رايقه

سلم الغالي دار علايق .. ماخلاش الخاطر ضايق

ياسلم الغالي وفلوسه .. ماخلا حاجه مخصوصه

ياسلم سيد الكاصه .. ماخلا حاجه خاصه

اللهم مصلي عالنبي .. الكسوة كسوت عيت البي

سلم بوه منميله .. علي هالساعه عابيله

مبروك عليه كساويه بطولت عمره وتهنيه

مسقد ماشي للريمة .. ان شالله بين ايديه سقيمه

يامبروك على الحبيب .. سجلناها في الكتيب

سلم بوه قعدله مرسى .. ياجياب كساوي عرسه




يـتبع

غدير
26-11-2010, 12:47 AM
وهذيم بعض الشتاوات الي يقولو فيهم في نهار الحنه والحنه ثاني يوم من ايام العرس وتبدا من قبل العصر لبعد المغرب

http://www.hawa.ly/uploadednew/15_11290721280.jpg

على اول ماتبدينا .. علي محمد صلينا

على اول مانبدا ونقول .. على محمد والرسول

مبروك علينا جيتنا .. جينا بنحنو كنتنا

ياسلم بو عين كبيره .. حناياته تقول مسيره

يسعيدي بنحني مرته .. هالي تضاوا كندرته

ياعين رجالك قالولك .. خوديه اليوم علي طولك

نهار اليوم نبوه طويل .. ان شالله مايجيناش الليل

ريتو هالنهار الباهي .. فرحانه والخاطر زاهي

ريتو هالنهار منور .. من زمان عليه اندور

الغالي سلم جيرانه .. فرحو بيه وعلو شانه

حباب وجيران وفيه .. بارك فيهم جمَليَه



يــــــــــتبــــــــــــع

غدير
26-11-2010, 01:03 AM
اخر يوم من العرس هوا يوم الزفه والي مازال عندنا نسموه يوم ( الجحفه )


وهذيم بعض الشتاوات الي يقولو فيهم يوم الزفه



حوش كبير وفمه رايس .. بيخشولا زوز عرايس

الله يجعنهم ديما فن .. عرايسهم بالزوز يجن

يسعيدي عيني بتريه .. عريس وخوته يحادو فيه

سعيدي شافنه العيون .. عريس مقعمز عالصالون

نهار اليوم تمنيته .. طلبت المولى ولقيته

مبروك العرسه والخيمه .. يانشاد علينا ديما

قولي بسم الله وخشي .. في حوش الزينين تمشي

ياسلم رجالي جابوها .. البنت الي مسمي بوها

ان شالله خشيتي بعمار .. اليابس قدامك يخضار

مرحبا يالافيه .. بالصحه والعافيه

مرحبا يامرت خوي .. يعمَارة حوش بوي

انت ياحوش عمارك جي .. من سبع تراكين ضوي

الحوش اللي وساع تراكينه .. انشالله تعمر فيه الزينه


وبعد الدخله نقولو عندنا البارود وهذيم بعض الشتاوات الي يقولو فيهم بعد ضرب البارود



الغالي كيف الطير الحر .. فرغ باروده وظهر

ياسلطان عليك براوه .. خليت الشارع يضَاوه

السلطان براوه ليه .. مايقدر والي يطريه

الحوت الحوت على الغندور .. حوشا يشعل فيه النور

براوا ياكاحل لنعات .. بارودك فات النجمات

سلم فراغ البارود .. صح ايديه عطيه الجود


يتبـع

غدير
26-11-2010, 01:07 AM
اغاني اهل العريس



يامبروك عليه خداها .. الي مشارك في الجد معاها

يامبروك عليه الوده .. نور العين سمية جده

كان خداها موش غرابه .. من قبل حبايب ونسابه

تركنا مانبوش حدود .. وادي في وادي مهدود

عيني عالمالح ماتابا .. تنزل عالي حلو شابه

بروحه ماوالي داعاه .. حرث في وادي سايل ماه

مبرك يوم الي توصلنا .. تغرف بالكاشيك عسلنا

مبرك يوم الي بتجينا .. من غير الراحه والزينه

وين عرفها بنت اوصول .. جي لمربوعة بوها طول

عشرة عالعشرة ممتاز .. جاب عروسه تقول قزاز

يامبروك عليه اللمه .. فرحانات خواته وامه

بو لحيه عالخد خفيفه .. حام وجاب غزاله كيف

بو كسوه كيف مجددها .. ان شالله يسلم ويبيدها

يامبروك على بدريها .. ان شالله بالخير يكافيها

مبروك على صغير سنه .. انشالله ليام يوالنه


يــــــتبــــــــع

غدير
26-11-2010, 01:10 AM
اغاني اهل العروس



خديتي ياكاحل لعيون .. رطيبه من راس العرجون

خديتي ياريم الجافل .. صغير خوته ومدلل

يامبروك عليك خديتي .. من راس العرمه وازيتي

خديتي يازينه مبروك .. ولد ممتاز وعاجب بوك

ياسعيدي بيضة وطويله .. خطابك مادارش حيله

الوي حزامك من نص الليل .. قدامك سبع رجاجيل

اللي حازك مبرك يومه .. مايخمم كان دار عزومه

مربيها لواي لشناب .. مع الزينين اتدير صواب

سلم بوها دار الواجب .. ماعلا العين على الحاجب

يامبروك على لبنيه .. طيابة شاهي العشيه

ياغالي بيش تدلعها .. حتى للخارج طلعها

بوها قال علي ماتهون .. كان لراجل باهي يصون



وهذيم بعض ماقدرت نجيبه ليكم ياغوالي

الصراحه نقطه من بحر

نتمنى يعجبوكم


والي عنده جهد يجيبه .. هذا عرس وليد حبيبه

المحبه لله
26-11-2010, 01:14 AM
ما شاء الله تبارك الله
مجهود مميز جدا منك والله تكرمي
الكلمات جدا أعجبتني فعلا جميلة
الله يديم عليكم الأفراح يارب

دلع
26-11-2010, 02:08 AM
اللي رافع خشمه ع الكل*** معايا لا يربط لا يحل


شالت فيك العين نظرها ..... يامرهون أجبرخاطرها


عينى مضايق خاطرها .. وينك ياجلاى جضرهـا



صعيبـة ننـسى نـاس قـدم .. غـلاهـم متخـلط بـالـدم


الغالي ناولك علي الراحه --جايبلك حوش بمفتاحه

شكلك عاصلايا ديما --حصلتي سمح التبسيمه

تهاني صالح
26-11-2010, 04:25 AM
بارك الله فيك غدير

lyaal
26-11-2010, 03:42 PM
مشاء الله
تسلمى غدير
طرح اكتر من رائع

سويت
26-11-2010, 07:38 PM
ماشاء الله
واجدات هالشتوات
مع ان فى كلام مافهمتش كويس
تسلمى غدير بارك الله فيك

غدير
27-11-2010, 12:38 PM
مشكورت يابنات على مروركن غيرعاد وين مشاركاتكن

نبوا شوي شتاوات من كل وحده تمر عالموضوع

الغاليه دلع شكرا ليك عالشتاوات السماح

واستنوني راجعتلكم بشوي شتاوات اجدد

غدير
27-11-2010, 12:51 PM
في الأعراس النسوان يتفاخرو برجالهم ويشتو عليهم


وهذيم شوي شتاوات على الرجال من الي خطرو علي بالي

مع اني مش شاطرة في الشتاو راهو والي حاطتهم في الموضوع مقصقصه على قديش واحد بيش جبتهم


الحوت علينا ماشالله .. التوبه والخوف من الله

عيني سلم ارجالها .. خلوها رايق حالها

ياسلم ارجالك يازينه .. ياحادوك ايسارا ويمينا

سواق اطناشن جراره .. ان شالله ما تصهدني ناره

ياربي سلم غوالينا .. مابين المصنع والمينا

سواري زبده لباسين .. ان شالله مايغبوا عالعين

ان شالله ماتنزلي دمعه .. عالغالي صلاي الجمعه

ياسعدودي عندي فيهم ... رجاله ويقولوا بيهم


ياسعدودي عندي حصة ... فيكم ياقطاع القصة

ليبيه
28-11-2010, 01:18 PM
مشاء الله شتوات حلوات
مشكوره حبيبتي غدير

هذم بعض من أللي حفضتهم في فرح أختي
طيب مادرتيش وكاله.. باتك قاعد في الرجاله
يابنيه كان جيتي لمك.. مشكوره ماوالي دمك
عندي بات عطني ربي.. وين يفوت الناس اتصبي
سلم عمك ياوداده.. حطك غرسه بين أولاده
يامبروك على غالينا.. جاب غزاله من وادينا
سلم ولد العم الداني.. ماخلها للبراني

تعشق زوجها
28-11-2010, 01:32 PM
معلش سؤال
كلمة شتاوه منين اصلها
واما مناطق يستعملو فيها الكلمه
وهيا معناها اغنيه والا اني غالطه

أم زينة
28-11-2010, 02:13 PM
ماشاء الله عليك
موضوعم حلوووو
ياريت انشاركك بس والله مانحفظ
متابعة المشاركات

أم توتي
28-11-2010, 11:21 PM
حلوات يهبلوا آهوا هذي الأعراس الصح
بارك الله فيك

جلنار
29-01-2011, 09:03 PM
كلام حلو هلبة

لكن الحق فيه حاجات مش فاهمتها


موفقة و دمتي مبدعة حبيبتي

كلينا
19-05-2013, 08:01 PM
أحلي شئ الحق ف أعراسنا هو الشتاوي

وعرس من غير الشتاوي والملالة ( بوطويل) الحق كآنه مش عرس ليبي

ربي يدوم علينا الفرح والأعراس

أنثي استثنائيه
23-05-2013, 07:33 PM
كالعادة إبداع رائع

وطرح يستحق المتابعة

شكراً لك

بإنتظار الجديد القادم
دمت بكل خير

رواسي ليبيا
02-07-2013, 03:27 PM
روووعه الشتاوي
يسلمووو

لعيونه
11-06-2014, 03:22 AM
حلوووو

العصفورة
12-06-2014, 06:09 PM
مشكورة على الشتاوات وبارك الله فيك